Пејачот Ѓоко Јовиќ раскажа дека плачел секој ден во еден период од животот, кога некои нешта му биле многу тешки.
Во емисијата „Животна приказна“, Јовиќ, кој потекнува од Валандово, рече дека како дете нижел тутун и плачел кога мајка му и татко му го буделе да оди да работи.
– Јас секој ден сум плачел. Не ми се одеше на тутун, ама никогаш! Мајка ми уште пред да влезе во соба да ме разбуди и татко ми, јас го слушам, треба 10 пати да ме мрднат. Стани! Јас се правам дека не ги слушам – раскажа пејачот.
– Во минатото моите родители се занимавале со земјоделие во кое преовладувал тутунот. И јас сум го работел тоа, знам колку е тешко и затоа ги ценам луѓето кои ја одржуваат во живот таа земјоделска култура – рече пејачот во една прилика во „Женски магазин“.
– Не се срамам да зборувам за моето минато и секогаш сум подготвен повторно да го работам тоа. Најважната лекција ја научив од татко ми. Еден ден ме седна и ми кажа: „Сине, јас можеби не сум ти дал богатство, но сум направил сите да зборуваат за тебе само убаво. Сум оставил чисто лице“. Тие зборови ќе ги паметам цел живот – додаде пејачот, кој со сопругата Ивана има четири деца.
