Петар Грашо го оствари еден од своите најголеми професионални соништа – сними нова верзија на култната песна „Ako me ostaviš“, која ја прослави Мишо Ковач. И тоа не било каде, туку во легендарното лондонско студио „Аби роуд“, во придружба на Кралскиот филхармониски оркестар.
Новата верзија на песната е создадена како почит кон Ѓорѓе Новковиќ, автор кој ја обележа домашната музичка сцена, а за Грашо тоа беше можност да ја спои носталгичната емоција на оригиналот со модерен, оркестарски пристап.
Зад импресивната изведба стои и силната поддршка од неговата сопруга Хана Хуљиќ Грашо, која не само што беше со него, туку и активно учествуваше во проектот. Хана работеше на аранжманот и ги пееше придружните вокали, потврдувајќи уште еднаш дека нивната соработка оди подалеку од семејните рамки и функционира и на музичко ниво.
„Иако музичарот пред микрофонот е највидлив, зад секој успех стои тимска работа“, нагласуваат блиски соработници. Во овој случај, клучна алка беше Хана, која со своето знаење и чувствителност ѝ даде дополнителна димензија на изведбата.
На социјалните мрежи, Грашо ги сподели своите впечатоци од лондонското студио со своите следбеници.
