Петар Георгиевски-Камиказа, лидерот на „Меморија“, реагираше на коментарите на социјалните мрежи во пресрет на концертот на групата, закажан за 23 октомври.
Во објавата на Фејсбук, Камиказа се осврна на коментарите од оние кои прашувале дали ова ќе биде последен концерт на групата и зошто повторно се организира концерт по претходниот голем настап.
„Чудни некои луѓе, пак ли ова ќе ни бил последен концерт?! Да ги прашам, дали сем премиерата, тоест концертот на датумот што привилегираните имале прилика истиот да го доживеат и видат, имало шанса втор пат истиот да го видат?! Така и овој, ќе има премиера и нема да има реприза!!!“, напиша Камиказа.
Тој порача дека на концертот ќе дојдат оние кои сакаат да бидат дел од него, а се осврна и на негативните коментари.
„Кој сака да дојде, ќе дојде, тој што не сака и беспари да го пуштиме, нема да дојде, но ете некои решиле ‘зјан’ да ни прават!!! Се гледаме на 23 октомври, нормално тие што ќе дојдат и ќе уживаат во македонскиот музички ‘Времеплов’. Македонија вечна“, напиша Георгиевски.
„Меморија“ е еден од најдолговечните македонски рок-бендови, а Георгиевски е лидер и единствен постојан член на групата повеќе од четири децении. Годинава историјата на бендот беше претставена и преку изложбата „Времеплов, од црно-бело во боја“ во МКЦ, со фотографии, плочи, инструменти, награди и други архивски материјали од различните периоди на „Меморија“.
