Згодна пејачка е новата љубов на Јован Јованов кој во 2018 гоина се разведе од својата сопруга Николина, со која има ќерка.
Јованов во поткастот на Стефан Лазаров неодамна рече дека е во добри односи со поранешната сопруга, дека останале пријатели и дека во Канада, каде што и двајцата живеат, имаат заеднички бизнис.
На фестивалот „Макфест“ каде што настапи на последната вечер со која се прослави 40-годишнината од постоењето, Јован настапи сам и во дует со Маја Саздановска, со песните „Магија“ и „Ти ме сакаш“.
Но, на фестивалот не дојде сам, туку со неговата сакана Тиана Димова која е исто така пејачка. Таа настапува со бендот „Трета смена“ како што објави „Црно-бело“, и многу сака да патува.
Засега, нивната љубов функционира на далечина, зашто Јован живее во Канада, а Тиана во Македонија, но изгледа дека тоа не им е никаква пречка.
– Јас и Николина љубовно не сме заедно со години, но добро функционираме како бизнис-партнери. Едноставно може да се функционира доколку имате разум, знаете да разграничите што се приоритети во животот.
Нормално дека би правел бизнис со неа зашто ѝ верувам, зашто ми е најголема поддршка и најдобар другар. Заедно дојдовме во Канада, ме знае многу добро, а и јас неа. Ја имаме Малеа и тоа е нешто што ќе нѐ поврзува цел живот – рече Јован во интервју за „Слободен печат“ во 2023 година.
