Српскиот тениски ас Новак Ѓоковиќ се квалификуваше за финалето на Австралија опен по маестралната победа над Јаник Синер во полуфиналето.
Успехот на Ѓоковиќ предизвика воодушевување, а поддршка доаѓа и од бројни јавни личности.
По тој повод, се огласи и српската пејачка Марија Шерифовиќ, испраќајќи емотивна порака до Ѓоковиќ на социјалните мрежи.
– Новак не е машина. Не е ниту робот. Новак е човек со срце и ум кои вибрираат на фреквенции многу повисоки од оние на кои сме навикнати. Неговите победи не се само негови. Тој победува во име на секое битие кое живее за вистината и искреноста, без маска, без потреба да му додворува на кој било – напишала Шерифовиќ.
Пејачката во продолжение истакнала дека успесите на Ѓоковиќ ги надминуваат спортските рамки.
– И затоа она што го гледаме не е само спорт. Тоа е потсетник дека е можно да останеш свој, исправен и чист, дури и кога светот е бучен, неправеден и склонен кон заборав. Новак нè учи не како се победува против другите, туку како се победува без да се изгубиш себеси. Мирно спиј, шампионе. Утре е само резултат, вечноста е веќе твоја – порачала Марија Шерифовиќ.
