Ако секој час станете од работната маса и малку прошетате или се истегнете, би можеле значително да го намалите ризикот од рак, покажува неодамнешно истражување објавено во списанието PLOS Medicine. Според резултатите, секој час непрекинато седење во текот на денот е поврзан со дури 9 проценти поголем ризик од смрт предизвикана од рак. Проблемот не е само во тоа колку вкупно седиме, туку особено во тоа колку долго седиме без прекин.
„Нашите резултати покажуваат дека влијанието на седечкиот начин на однесување врз здравјето не зависи само од вкупното време поминато во седење, туку и од тоа дали тоа време го поминуваме во долги, непрекинати периоди или го прекинуваме со движење“, истакнаа истражувачите предводени од Фредерик Ху, виш предавач по јавно здравство на Универзитетот во Глазгов, Велика Британија.
Истражување
За потребите на истражувањето, научниците анализирале податоци од повеќе од 91.000 учесници од големата британска база на податоци UK Biobank. Сите учесници носеле уреди за следење на активноста во текот на една недела, со цел да се забележи нивното секојдневно движење, а потоа биле следени околу 12 години.
Резултатите покажале дека лицата кои долго време седат без да станат имаат поголем ризик од развој на рак или смрт од рак, особено од видови рак кои често се поврзуваат со дебелина и дијабетес тип 2.
Но, добрата вест е дека дури и кратките прекини на седењето можат да имаат позитивен ефект.
Мали промени, голем ефект
Добрата вест е дека не е потребно драстично да ги менувате навиките за да го намалите ризикот. Истражувачите утврдиле дека замената на само еден час дневно непрекинато седење со лесна физичка активност, како кратка прошетка или истегнување, би можела да го намали ризикот од смрт од рак за 12 проценти.
Научниците објаснуваат дека ваквото откритие има и биолошка основа. Претходните истражувања покажале дека кратките периоди на движење кои го прекинуваат долгото седење ги подобруваат метаболичките реакции на организмот во споредба со непрекинатото седење.
Како да го прекинете долгото седење?
Не мора веднаш да започнете со напорни тренинзи. Наместо тоа, можете да почнете со следново:
-станувајте секој час и прошетајте неколку минути;
-направете неколку едноставни вежби за истегнување;
-одете по вода наместо да ја чувате покрај работната маса;
-дел од телефонските разговори водете ги стоејќи или одејќи.
