Актуелната Мис Универзум 2025, Фатима Бош, предизвика загриженост кај присутните кога ненадејно се спушти на колена додека се возеше на парадна платформа на Фестивалот на овошјето и цвеќето во Амбато, Еквадор, објави „Пипл“.
Инцидентот се случил во неделата, на 15 февруари. Бош, облечена во светлозелена свечена тоалета, стоела на цветно украсена платформа и им поздравувала на насобраните граѓани.
Снимките што брзо се проширија на социјалните мрежи покажуваат дека таа се обидува да се задржи за оградата зад себе, по што клекнува. Од толпата се слушаат вознемирени реакции, а една жена веднаш се искачува за да ѝ помогне. Според очевидци, Бош била свесна и разговарала со лицето што ѝ притекло на помош.
Од организацијата Мис Универзум информираа дека станува збор за краткотрајна вртоглавица по повеќечасовен ангажман на отворено во рамки на фестивалската парада.
„Од претпазливост, веднаш ѝ беше укажана помош од нејзиниот тим и од локалните медицински служби. Таа остана свесна, беше прегледана и закрепна за кратко време. Распоредот ѝ е прилагоден за да има доволно одмор и хидратација. Се чувствува добро и изрази благодарност за топлиот прием во Еквадор“, се наведува во соопштението.
Од таму дополнуваат дека здравјето и безбедноста на носителките на титулата се приоритет, особено во периодот на меѓународната турнеја што Бош моментално ја реализира, а која вклучува културни, хуманитарни и општествени активности во повеќе држави.
