Меган се присети на своите актерски почетоци со Елен, кога дошла во истата зграда каде што се снимало шоуто за аудиции во стар автомобил со скршена брава.
Водителката Елен Деџенерис на својот јутјуб-канал најави дека нејзината следна гостинка ќе биде Меган Маркл. Таа објави краток инсерт од интервјуто во кое Меган зборува за својот живот пред да го запознае принцот Хари.
Меган раскажа дека на почетокот на нејзината актерска кариера често доаѓала во зградата на „Warner Bros“ каде се снима шоуто на Елен.
Поради аудициите, таа доаѓала таму толку често што обезбедувачите на паркингот ѝ посакувале среќа секогаш кога ќе ја виделе. Таа раскажа и како во тоа време возела стар Форд со скршена брава.
„Паркирав некаде на самиот крај од паркингот, го отворав багажникот, ја затворав вратата од багажникот, а потоа ползев по седиштето“, рече Меган низ смеа, додавајќи дека се преправала дека бара нешто во багажникот пред минувачите.
Досега посетата на Меган во шоуто на Елен се држеше во строга тајност од светската јавност, па веста изненади многумина. Целото интервју ќе излезе утре, најави водителката.
