Елвис Присли, некрунисаниот крал на рокенролот, бил човек чиј живот бил подеднакво драматичен и на сцената и надвор од неа. Неговиот љубовен живот бил сложена приказна исполнета со страсти, контроверзии и скршени срца. Неговиот поранешен телохранител во своите мемоари тврдел дека Елвис вистински сакал само четири жени во животот: Анита Вуд, Присила Присли, Ен-Маргрет и Линда Томпсон.
Подемот кон славата и првите големи љубови
Пред да стане светски феномен, Елвис имал врски кои навестувале колку ќе бидат сложени неговите идни односи. Една од првите била со Џун Хуанико, обожавателка која ја запознал во 1955 година. Нивната романса завршила поради растечката слава на Елвис и притисокот од неговиот менаџер, полковникот Том Паркер, кој сакал пејачот да биде поврзуван со актерки.
Набргу следувале врски со холивудски имиња. Кратко време бил во врска со актерката Натали Вуд, која се обидел да ја импресионира така што изнајмил цела киносала само за нив двајца. Сепак, врската пропаднала поради блискоста на Елвис со неговата мајка Гледис, што наводно ѝ било одбивно на актерката. Интересен е и случајот со Рита Морено, која излегувала со Елвис неколку пати само за да го направи љубоморен својот тогашен партнер, Марлон Брандо. Подоцна признала дека пејачот ѝ бил „здодевен“.
Сепак, првата сериозна врска што го привлече вниманието на јавноста била онаа со Анита Вуд, пејачка и телевизиска водителка. Од 1957 до 1962 година, Анита била „девојката број еден“ на Елвис. Поради него дури одбила и договор со „Парамаунт пикчрс“. Нивната врска се распаднала додека Елвис служел војска во Германија, каде што ја запознал жената која подоцна ќе му стане сопруга.
„Тоа беше најтешката одлука во мојот живот. Знаев дека, штом ќе заминам, нема враќање“, изјавила Анита за раскинувањето.
Единствениот брак
Најпознатата врска во животот на Елвис несомнено била онаа со Присила Болио. Се запознале во Германија во 1959 година, кога тој имал 24, а таа само 14 години. И покрај разликата во годините, останале во контакт, а Присила подоцна се преселила на неговиот имот Грејсленд. Се венчале во 1967 година, а девет месеци подоцна ја добиле ќерката Лиза Мари. Сепак, бракот бил исполнет со проблеми, меѓу кои и неверството на Елвис и зависноста од лекови. Се развеле во 1973 година.
View this post on Instagram
„Не го напуштив затоа што не го сакав. Тој беше љубовта на мојот живот. Заминав затоа што морав да откријам каков е светот“, објаснила Присила години подоцна.
За време на врската, а подоцна и бракот со Присила, Елвис имал интензивна афера со шведско-американската актерка Ен-Маргрет, која ја запознал на снимањето на филмот „Вива Лас Вегас“ во 1963 година. Нивната хемија била очигледна, а многумина ја нарекувале „женскиот Елвис“ поради сличната енергија. Во своите мемоари таа ја опишала нивната поврзаност како „струја што поминала низ двајцата“ и „сила што не можеле да ја контролираат“. Иако биле длабоко поврзани, Елвис на крајот го исполнил ветувањето што ѝ го дал на Присила и ја прекинал врската со Ен-Маргрет.
View this post on Instagram
Последните години и потрагата по мир
По разводот, Елвис утеха пронашол во врската со Линда Томпсон, поранешна мис на Тенеси. Нивната врска траела повеќе од четири години, од 1972 до 1976 година, а Линда живеела со него во Грејсленд. Иако биле блиски, Линда го напуштила затоа што повеќе не можела да го поднесува неговиот начин на живот, неверството и сè поголемата зависност од лекови. Таа сакала „нормален живот“, нешто што покрај кралот на рокенролот не можела да го има.
Последната жена во неговиот живот била Џинџер Алден. Ја запознал во 1976 година, кога таа имала 20, а тој 41 година. Се свршиле по само неколку месеци, но никогаш не стигнале до брак. Токму Џинџер го пронашла безживотното тело на Елвис на имотот Грејсленд на 16 август 1977 година.
Љубовниот живот на Елвис бил одраз на неговата кариера: спектакуларен, страстен, но и трагичен. Тој бил човек кој пеел за љубовта пред милиони луѓе, а истовремено се борел да ја пронајде и задржи во сопствениот живот, оставајќи зад себе приказна за големи романси и уште поголеми загуби.
