Пејачот Даниел Кајмакоски за првпат проговори по немилиот настан со киднапирањето, откривајќи дека одлучил свесно да се повлече од јавниот живот и да се посвети на најблиските.
По инцидентот што се случи по негов настап во Белград, Кајмакоски вели дека тешкиот период е зад него и дека сега е фокусиран на позитивните работи.
„Не сум од шеќер, доволно сум силен да продолжам понатаму. Пред сè сум татко и сакам моето семејство да биде сигурно и среќно“, изјави пејачот.
Тој нагласи дека токму семејството и внатрешниот мир се најважни, додавајќи дека без насмевка и стабилност ништо нема вистинска вредност – ниту работата, ниту односите.
„Семејството останува, сè друго е минливо. Затоа решив да се повлечам и да поминувам повеќе време со сопругата и децата“, истакна Кајмакоски.
Иако моментално не е активен во јавноста како порано, пејачот откри дека не се откажува од музиката и дека работи на нови проекти, но засега не сака да открива детали.
Во разговорот, тој се осврна и на своите колеги, посочувајќи дека многу учи од поискусните уметници. Посебно ја издвои Маја Оџаклиевска, за која рече дека ја смета за „жива легенда“ и голем пример.
„Од постарите колеги учам како да бидам човек и како да ја одржам рамнотежата меѓу кариерата и семејството“, додаде тој.
