Претставата на Драмскиот театар „My name is Goran Stefanovski“, во режија на Бранислав Миќуновиќ е своевидна интимна посвета на режисерот, на пријател и еден од најзначајните драматурзи на екс ју и европскиот театарски простор.
Вечерва во Драмски театар, со почеток од 20 часот е закажана нејзината втора изведба за оваа сезона.
Тргнувајќи од изјавата на Горан дека „идентитетот не се дефинира туку се освојува од ден на ден, како и слободата“, драматургот Бранислава Илиќ направи авторска адаптација со наслов „My name is Goran Stefanovski“, преку монтажа на сцени од седум драми на Горан Стефановски (Црна дупка, Лонг плеј, Сараево, Казабалкан, Хотел Европа, Евроалиен и Одисеја). Со оглед на тематското преиспитување на односот меѓу идентитетот и домот, во сценска смисла станува потрага по идентитетот на поединецот растргнат помеѓу желбата за постигнување лична слобода и желбата за простор на сигурност. Претставата го покренува прашањето за релевантноста на оваа вечна дилема на човекот, во свет во кој сè е на продажба, а интересот и моќта станаа поважни општествени категории од правото на слобода и безбедност на секој поединец.
Од 1974 година (Јане Задрогаз) до 2013 година (Огнени јазици), во Драмскиот театар беа поставени дванаесет претстави по текстови на Горан Стефановски. Затоа, не е чудно што во дивизијата има голем број актери и актерки кои покрај деловната соработка имаа можност да воспостават пријателски однос со Горан.
Играат: Стефан Вујисиќ, Билјана Драгичевиќ Пројковска, Игор Ангелов, Драган Спасов Дац, Златко Митрески, Софија Куновска, Јелена Жугиќ, Соња Станболџиоска, Дамјан Цветановски, Ана Димитрова и Саша Димитриевска.
Билетите по цена од 300 денари се достапни на билетарница во Драмски театар и онлајн преку karti.com.mk
