Претставата „Мојот маж“ во режија на Нела Витошевиќ е своевиден колаж од расказите на Румена Бужаровска и авторски монолози.
Денес, на 10 март (петок), со почеток од 20 часот во Драмски театар имате шанса да ја гледате оваа претстава, во која играат: Игор Ангелов, Сања Арсовска, Сара Климоска, Наталија Теодосиева, Исмет Шабановиќ, Филип Трајковиќ, Емилија Мицевска и Трајанка Илиева – Вељиќ.
Драмската структура на театарската претстава Мојот маж е изградена од два меѓусебно испреплетени материјали, и тоа, драматизацијата на шесте раскази (Супа, Празно гнездо, Прељубник, Осми март, Гени и Лиле) и документарениот материјал произлезен од авторските монолози. Дејствата/состојбите од расказите на Бужаровска, како и документарниот дел (авторските монолози) тематски се цврсто поврзани со поднебјето и времето во кое се одигруваат, без притоа да се засноваат на дневно-политички актуелности. Расказите и авторските монолози имаат за цел да поттикнат надминување на стереотипите и предрасудите, и отворено инсистираат на судир помеѓу традиционалното и современото. Сега, денес, се уште имаме потреба да се соочиме со сегашноста преку ревидирање на минатото.
Играно-документарниот пристап, како жанровска определба и драматуршко режисерски концепт, е сеприсутен на европските театарски сцени, но е кревок/ редок пример на македонската театарска сцена. Играно-документарниот пристап нуди едно сосема ново, поинакво театарско искуство, кое предизвикува силни емоции и соочување со себе и од себе, со себе кон другиот, од другиот кон себе. Тоа е редок колективен чин кој не е приземно сентиментален и патетичен, туку напротив длабоко е емпатичен и хуман. Присутноста на театарска спонтаност (кај актерот и гледачот) доведува до ослободување и отвара простор за различна театарска перспективност.
Билетите изнесуваат 300 денари, истите се достапни преку karti.com.mk или на билетарница во Драмски театар.
