Познатиот денсер и основач на култната група „Ѓогани“, Ѓоле Ѓогани, се потсети на своите денови од младоста и ја раскажа никогаш досега слушната приказна за првата средба, забранетата љубов и бурна врска со поранешната сопруга Слаѓа Делибашиќ.
Пред да започне нивната романса во Италија, каде што Ѓоле бил дел од европската танцова елита, тие се запознале во белградската сала „Пинки“ преку неговиот брат Гаги:
„Менаџерот ми рече дека е досадно сам да играм и дека ми треба група. Се сетив на танцовите школи во Белград и го прашав Гаги. Така ја запознав Слаѓа. Месец и пол вежбевме кореографии, заминавме во Италија и така сè почна. Тогаш ни во сон не мислев дека ќе ми стане сопруга“, се потсети Ѓоле, додавајќи дека тогаш тој бил во врска со девојка од Рим, а Слаѓа имала дечко кошаркар.
Љубовта се родила за време на турнеите во Италија, но најголемиот шок следел по враќањето во Белград кога Слаѓа останала бремена, а Ѓоле морал да отиде на разговор кај нејзиниот татко, строг Црногорец:
„Рацете ми се потеа. Отидовме кај нејзиниот татко Љуба во викендицата кај Пожаревац. Му реков: ‘Чичко Љубо, вашата ќерка е бремена’. Човекот беше во шок, почна да вика, му се заврте во главата! Не знаев дали ќе стане да ме тепа. За среќа, маќеата пресече и рече: ‘Ајде бре, стани и честитај им на децата!’ Така решивме да се земеме“, искрено раскажа Ѓоле.
