Ноќеска е фрлена експлозивна направа врз куќата на Здравко Чолиќ во елитната белградска населба Дедиње. Според првичните информации од српските медиуми, во инцидентот нема повредени лица, но е причинета значителна материјална штета.
Како што наведуваат неофицијални извори, во моментот на експлозијата пејачот наводно не се наоѓал во домот, но засега нема официјална потврда дали и каде било присутно неговото семејство. Жителите од околината изјавиле дека биле разбудени од силна детонација, која предизвикала вознемиреност во целиот кварт.
По пријавата, полициски екипи веднаш го обезбедиле местото на настанот, а пристапот до куќата бил блокиран. На терен интервенирале припадници на Министерството за внатрешни работи, заедно со дежурен обвинител од Вишото јавно обвинителство во Белград.
Во тек е истрага за утврдување на околностите под кои дошло до инцидентот. Форензичките служби собираат траги, а се прегледуваат и снимки од безбедносните камери во околината со цел идентификација на сторителот и утврдување на мотивите за нападот.
