Македонската мејкап артистка и пејачка Зои Блаж повторно е во Македонија, а овојпат престојот има посебно значење – со неа се и сопругот Тадеј Матијашиќ и нивната ќеркичка Мариа.
Токму во кругот на најблиските, Зои организираше роденденска прослава за својата мала наследничка. Иако Мариа го прослави својот прв роденден во мај, семејството три месеци подоцна направи уште една прослава во Македонија.
За оваа пригода, Зои и Мариа беа модно усогласени и позираа во складни фустанчиња, а гордата мајка сподели фотографии од семејната прослава на социјалните мрежи.
„Иако роденденот официјално беше во мај, моравме да направиме прослава што ѝ доликува на нашата принцеза. Ти благодарам Господе за секој ден поминат со неа“, напиша Зои.
Престојот во Македонија очигледно многу ѝ значи на Зои, која веќе неколку години живее во Германија поради ракометниот ангажман на сопругот Тадеј.
Споделувајќи моменти од враќањето дома, таа порача: „Полно срце, за првпат сите заедно во Македонија“.
Зои и претходно отворено зборуваше за тоа колку ѝ недостигаат Македонија и семејството. Во интервју за „Слободен печат“ раскажа дека откако станала мајка особено го чувствува отсуството на најблиските, но и дека се труди што почесто да доаѓа во Скопје за Мариа да расте опкружена со љубовта на семејството.
