Познатото музичко дуо Драган Спасов – Дац и Александар Митевски на уникатен начин ја изненадија Маја Гроздановска-Панчева за нејзиниот роденден.
Тие уште еднаш докажаа дека се мајстори за правење незаборавна атмосфера, но и за вистински пријателски изненадувања. Изминатиов викенд, во текот на нивниот заеднички настап, во центарот на вниманието се најде шармантната пејачка, која го прослави својот роденден на сцената.
Додека микрофоните беа „жешки“, а публиката уживаше во македонските рефрени, Дац и Александар приредија неочекуван пресврт. На сцената беше внесена специјална роденденска торта со запалени свеќички, што кај Маја предизвика огромна насмевка и емоции.
Она што на сите им падна во очи и стана главен хит е дизајнот на тортата. Имено, тортата беше во облик на фудбалска топка, што е очигледна и симпатична „провокација“ и посвета на нејзиниот сопруг, македонската фудбалска легенда Дарко Панчев. Славеничката со задоволство ја прифати оваа фудбалска шега додека колегите ѝ ја пееја роденденската песна. На видеото кое го објави Дац, со нив е и пејачката Билјана Ѓошева.
