Слаткаристика ѝ приреди специјално изненадување на Каролина Гочева во нејзината родна Битола.
Таа беше во публиката на неговиот настап во клубот „Голд Фелиција“. Кога забележал дека Каролина е меѓу гостите, Слаткар на посебен начин ѝ покажа колку ја цени, па ја пушти нејзината песна „Крај“.
„Големата Каролина Гочева ми беше на концерт“, напиша Слаткаристика на снимката од моментот што ја објави на социјалните мрежи.
Каролина потоа ја сподели објавата и јавно му се заблагодари за изненадувањето.
„Фала ти Марко на ова изненадување, златен си и голем! Те сакам“, напиша Гочева.
На видеото беше испишана и пораката: „Морав да ѝ покажам колку ја ценам, почитувам и сакам“, а Слаткаристика повторно ја сподели објавата на Каролина, додавајќи три црвени срца.
Настапот во Битола доаѓа неполни три недели по големиот концерт „Слаткаристика и пријателите“, кој раперот го одржа на Илинден, 2 август, на стадионот „Билјанини извори“ во Охрид, во организација на „Прагма продукција“. Со концертот Слаткаристика одбележа 20 години кариера, а на сцената му се придружија Калиопи, Тони Зен, „Некст Тајм“, Пајак, „Дупер“, Тајзи, Зи Бомб, Цоби, Криско и други музички гости.
Еден од најемотивните моменти на илинденскиот концерт беше појавувањето на неговиот син Моша. Таткото и синот заедно ја испеаја „Насмевка“, песната што Слаткаристика му ја посвети на Моша.
Посебен момент имаше и за неговата сопруга Сања Николиќ. Додека ја изведуваше песната „Кажи да“, Слаткаристика отиде зад сцената кај Сања, која ја изненади со бакнеж.
Слаткаристика деновиве повторно се потсети на тој момент и на социјалните мрежи го сподели бакнежот со Сања од концертот во Охрид, честитајќи ѝ го роденденот на Сања.
Двојката е во брак од 2014 година и го има синот Моша, а Сања, иако во последните години ретко се појавува во јавноста, беше покрај сопругот на еден од најважните концерти во неговата кариера.
