Поранешната македонска пејачка Сара Маркоска се омажи за својот партнер Ричард, а двојката за својот голем ден ја избра Грција.
Свадбената церемонија се одржа покрај море, во присуство на нивните најблиски. Просторот беше украсен со цветни аранжмани во розови, сини и бели нијанси, а морето и маслиновите дрвја беа природна позадина на прославата.
За свадбениот ден Сара избра бела венчаница со корсет во горниот дел и крој кој ја следи линијата на телото. Ричард, пак, носеше класичен црн костум, бела кошула и црна машна.
На фотографиите од свадбата младенците позираат покрај морето, но и во друштво на гостите кои беа дел од нивната прослава.
View this post on Instagram
Венчавката доаѓа неколку месеци откако Сара стана мајка, па оваа година за неа донесе големи промени и во приватниот живот.
Маркоска на македонската публика ѝ е позната уште од детските години. Таа ја претставуваше Македонија на Детската Евровизија, а подоцна учествуваше и во музичкото шоу „М2 – Потрага по ѕвезди“ и настапуваше на „Макфест“.
Во 2013 година со Панчо од ДНК ја сними песната „Зелено светло“, по што постепено се повлече од музичката сцена.
Подоцна Сара се пресели во Лондон, каде што продолжи да живее подалеку од македонската естрада, а сега со фотографиите од Грција сподели дел од свадбениот ден со Ричард.
