За семејството на музичарот Горан Папаз и неговата сопруга Наташа, годинашниот Илинден ќе остане запаметен по еден посебен настан. На 2 август, кога православните верници го чествуваат Свети Илија, тие ги крстија своите три деца – близначките Лена и Луна и нивниот брат Лазар.
Светата тајна беше извршена во водите на Охридското Езеро, во близина на Пештани, каде што најмладите членови на семејството го примија крштението и станаа дел од православната христијанска вера.
View this post on Instagram
Дел од атмосферата од овој значаен ден Папаз сподели и со своите следбеници на социјалните мрежи, објавувајќи фотографии од крштевката. Како и секогаш, објавата ја зачини со доза хумор.
„Си биле: поп, три бебиња и ладна вода… не е почеток на виц. Лена, Луна и Лазар успешно го „поминаа тестот“ и веќе се крстени во водите на Охридското Езеро. Честито и среќна крштевка, души мамини и татини.“
Неговата објава брзо привлече внимание, а под фотографиите се нижеа бројни честитки и убави желби од пријатели, колеги и обожаватели. Многумина на Лена, Луна и Лазар им посакаа да растат во здравје, љубов и со Божји благослов, а на нивните родители уште многу вакви среќни семејни мигови.
