Пејачката Емина Јаховиќ го дели истиот став за конфликтите меѓу Израел и Палестина како и познатата манекенка Бела Хадид.
Многу познати личности и претседатели ширум светот повикуваат на мир или конкретно решение, поддржувајќи и критикувајќи различни страни, додека слободна Палестина е она кон што нејзиниот народ се стреми. Јавноста ја чекаше објавата на познатата манекенка и Палестинка Бела Хадид, што таа сега и го направи.
Сестрата на Бела, Џиџи Хадид, манекенка со палестински корени, предизвика бурни реакции со својата изјава во која ги коментираше нападите на Хамас врз Израел, а целото семејство дури доби и бројни смртни закани. Сега Бела конечно се огласи.
Бела објави видео и писмена изјава на својот инстаграм-профил, во која првично се извини за молчењето, додавајќи дека „се мачи да најде идеални зборови“ за да ги коментира „длабоко комплицираните и ужасни“ настани во изминатите две недели. „Стравот не е опција“, напиша таа, а потоа додаде: „Луѓето и децата на Палестина, особено во Газа, не можат да си го дозволат нашиот молк. Ние не сме храбри – тие се. Моето срце крвави од болката и траумата што ја гледам како се одвива, како и од генерациската траума на моето палестинско потекло. Гледајќи ги последиците од воздушните напади во Газа, тагувам со сите мајки кои ги загубија своите деца и со децата кои плачат сами, со сите изгубени татковци, браќа, сестри , чичковци, тетки, пријатели кои никогаш повеќе нема да одат по оваа земја“, напиша таа.
View this post on Instagram
(@bellahadid)
„Ги осудувам терористичките напади врз кој било цивил, каде било“, напиша таа, додавајќи дека „тагува за израелските семејства“ по нападот на Хамас на 7 октомври. Таа ја истакна важноста од разбирање на тешкотиите со кои се соочуваат Палестинците ширум светот, на кои се гледа „само како терористи кои се спротивставуваат на мирот“, и го опиша искуството на нејзиниот палестински татко, кој беше протеран од Палестина со своето семејство.
„Сите ние мора да застанеме заедно во одбрана на хуманоста и сочувството – и да бараме нашите лидери да го сторат истото. Има итна хуманитарна криза во Газа на која мора да се обрне внимание. На семејствата им треба пристап до вода и храна. На болниците им треба гориво за напојување на генераторите, згрижување на ранетите и одржување на луѓето во живот“, пишува во изјавата на Бела.
Таа напишала и дека дури и во текот на војна, законите „мора да се почитуваат“, без оглед на околностите, и ги охрабри следбениците да „продолжат да вршат притисок“ врз светските лидери за помалку невини цивили да завршат меѓу „заборавените жртви на оваа војна“. Манекенката и нејзината сестра Џиџи претходно го поддржаа движењето за Слободна Палестина со тоа што се приклучија на пропалестинскиот марш во Њујорк.
На нејзината објава реагираше и пејачката Емина Јаховиќ, која во коментар го стави палестинското знаме и раширени раце во знак на поддршка за Палестина и Бела.
