Познатиот холивудски актер Џејмс Франко призна дека спиел со студентки од актерската школа што некогаш ја водел, додавајќи дека е зависник од секс и дека работи на решавање на проблемот.
Во подкастот „The Jess Cagle“ Франко рече дека спиел со студентки и дека тоа не е во ред, велејќи дека не ја основал актерската школа за да ги намами жените за сексуални цели.
„Во тоа време не бев со чиста глава. Мислам дека тогаш верував дека е во ред“, откри Франко.
Ова е прв коментар на Франко за обвинувањата изнесени против него пред речиси четири години,
кога „Los Angeles Times“ објави дека пет жени го обвиниле актерот за сексуално злоставување.
Франко претходно изјави дека развил зависност од секс откако престанал да пие алкохол, од кој бил зависен во младоста.
„Тоа е многу моќна дрога. Се навлеков на тоа пред 20 години. Единствено добро во тоа е фактот што останав целосно трезен, не пиев алкохол“, во тоа време изјави актерот.
Во интервју за овој подкаст, тој исто така рече дека се опоравува од зависноста од секс и дека работи на себе од 2016 година за да не ги повтори истите грешки.
