Американскиот пејач Џастин Тимберлејк покрена правна постапка со цел да го спречи јавното објавување на видеоснимката од полициската камера поврзана со неговото апсење во јуни 2024 година, објави „Пипл“.
Тимберлејк беше приведен на 18 јуни 2024 година во Саг Харбор, во сојузната држава Њујорк, под сомнение за возење под дејство на алкохол, како и за два сообраќајни прекршоци – непочитување на знак „стоп“ и движење надвор од сообраќајната лента.
Неговиот адвокат, Едвард Берк Помладиот, тогаш тврдеше дека пејачот не бил во алкохолизирана состојба. Во септември истата година, Тимберлејк прифати спогодба и призна помал прекршок.
На 2 март, тој поднесе тужба до Врховниот суд на округот Сафолк, наведувајќи дека објавувањето на снимката би претставувало нарушување на неговата приватност и би можело да предизвика сериозна и непоправлива штета врз неговиот личен и професионален углед.
Во поднесокот се посочува дека видеото содржи детали од внатрешноста на неговото возило и потенцијално чувствителни информации кои, според одбраната, не се од јавен интерес. Постапката следи откако полициската служба во Саг Харбор примила барање за пристап до снимката согласно Законот за слободен пристап до информации.
Според полицискиот извештај, Тимберлејк изјавил дека испил „едно мартини“ и дека ги следел пријателите до нивниот дом. Во документите се наведува дека неговото возило не застанало на знак „стоп“ и не се движело во својата лента, како и дека имал „црвени и стаклести очи“. Тој одбил да се подложи на хемиско тестирање и бил задржан преку ноќ.
По спогодбата во септември 2024 година, му беше изречена парична казна од 500 долари, дополнителни 260 долари судски трошоци, 25 часа општествено корисна работа, привремено одземање на возачката дозвола во траење од 90 дена, како и обврска да сними јавна порака за ризиците од возење под дејство на алкохол.
