Поранешниот фудбалер Дејвид Бекам ја препуштил контролата на својот Инстаграм профил на украински детски анестезиолог која работи во Харков за да ги опише искуствата од помагањето на луѓето во градот разурнат од војна.
Бекам има 71,4 милиони следбеници на Инстаграм, а тој одлучил да ја искористи неговата платформа за да ја истакне „неверојатната работа“ на медицинскиот персонал среде руската инвазија.
View this post on Instagram
Украинската докторка Ирина, шеф на регионалниот перинатален центар и детски анестезиолог, објави клипови и фотографии во „стори“, користејќи го профилот на Бекам и покажувајќи како војната влијае на работата на нејзиниот тим.
Ирина сподели видеа на кои се гледа подрумот каде што биле евакуирани бремените жени и новите мајки во текот на првите денови од инвазијата. Докторката истакна дека има работа 24/7 и дека заедно со колегите веројатно си го ризикуваат животот, но и дека не размислува за тоа бидејќи си ја сака работата.
Бекам пак, ги повика своите пријатели да донираат за добротворна организација која работи во Украина за да им обезбеди на семејствата пристап до чиста вода и храна, да обезбедат континуирани услуги за заштита на децата и да ја следат ситуацијата со бегалците во соседните земји.
Поранешен играч на Манчестер Јунајтед и Реал Мадрид, 46-годишниот Бекам, е инаку, амбасадор на УНИЦЕФ од 2005 година.
