Тафталиџани го сметаат за крал на скопските буреци. Но не само тие – околу оваа скопска бурекџилница гравитираат сите оние кои сакаат да си каснат сочно парче бурек, особено младите, без разлика од кој дел на градот доаѓаат.
Ја посетивме и ние, и ич не зажаливме што „протепавме“ пат до таму. „Оки“ се наоѓа на самиот пазар во Тафталиџе, а бурекот може да го начекате секој ден помеѓу 7 и 15 часот, но што порано – тоа подобро.
Тука бурекот – со крцкави кори – е издигнат на друго ниво. Затоа, ако сте расположени за балканско-кулинарска авантура, ова „дуќанче“ нема да ве разочара.
Маана? Што не работат 24 часа, односно после полноќ. Да работеа, Скопје ќе имаше уште една популарна дестинација за младите кои се мислат каде да „тераат“ после излегување, секако, на доцна вечера или на ран појадок.
