Српската пејачка Александра Пријовиќ (28), која распродаде пет концерти во загрепската Арена, кариерата ја започна во музичката емисија „Ѕвездите на Гранд“.
Пријовиќ учествувала во сезоната 2012/2013, а на аудицијата за првпат се пријавила една година порано. Таа тогаш имала само 15 години.
– Па, што се однесува до Александра Пријовиќ, тоа е навистина нешто неверојатно. Тоа што го направи, тоа ме потсетува на Лепа Брена и „Слатки грех“ и на 1983 година кога тоа исто така „пукна“ и кога направивме неверојатни концерти. Па, истото тоа се случи и со Александра – објаснил Саша Поповиќ.
– Таа првпат на аудиција дојде во 2011 година во Суботица. Со оглед на тоа дека имаше 15 години, јас тогаш ѝ одржав кастинг, тоа уште беше верзијата кога имаше вкупно 40-50 натпреварувачи и таа помина низ неколку емисии, мислам дека помина дури низ 4-5 емисии. Тогаш немаше жири да одлучува, само одвреме-навреме даваа по некој совет. Секоја сабота имаше различно жири. Во еден момент гласаа само гледачите и таа беше елиминирана. Таа тогаш толку многу се разочара – раскажал Саша.
Следната година тој лично ја поканил на аудиција.
– Следната година одржав кастинг за 18 девојки и ми требаа уште две. Тогаш одлучив да ги повикам девојките од минатата сезона, која ќе добие најмногу гласови, да пополниме за таа сезона. И секретарката ѝ се јави на Александра, таа беше во Бели Манастир, па ѝ рекла: „Нема да се натпреварувам, елиминирана бев, народот едноставно не гласаше за мене“. Не сакаше, па јас потоа ја зедов слушалката и ѝ реков: „Слушај, Александра, ова ти е последна шанса, дојди, па што и да се случи, поминеш – поминеш. И Александра и Андреана Чекиќ поминаа таа година во 2012/2013 година, беше фантастична – се присетил Саша за српски „Курир“.
