Во семејството Јоксимовиќ денес има двојна прослава – покрај Велигден, го слават и роденденот на пејачот, поради што семејството ќе се собере во домот на Жељко.
Многумина се изненадени кога ќе чујат дека Жељко Јоксимовиќ го слави својот 53. роденден, со оглед на тоа што речиси и не се променил во текот на сите овие години.
Да потсетиме, Жељко Јоксимовиќ е роден на 20 април 1972 година во Белград, а детството и младоста ги поминал во Ваљево – место што било и останало негова база. Веќе на 12-годишна возраст ја освоил титулата Прва хармоника на Европа на фестивал во Париз, што било само најава за блескава кариера.
Професионално е во музиката од најрана возраст, а во текот на 90-тите се истакнал како композитор на фестивали како Белградско пролет и Златна тамбурица. Успехот со песната „Песма сирена“ во 1998 година му ги отворил вратите кон меѓународни фестивали, каде што освојувал главни награди.
Покрај поп-музиката, создавал и музика за театар и филм, а клучен пресврт во кариерата му била 2000 година, кога го објавил својот прв албум за City Records, најпродаваното издание таа година.
Вистинска европска слава стекнал во 2004 година со песната „Лане моје“, со која ја претставуваше Србија и Црна Гора на Евровизија во Истанбул, освојувајќи го второто место и наградата за најдобар композитор. Токму тој успех му ги отворил вратите на меѓународната сцена, а во следните години остварил соработки низ цела Европа и компонирал хитови за многу изведувачи.
Во 2004 година ја основал продукциската куќа Minacord, преку која реализирал бројни проекти – од албуми, фестивали и филмови, до телевизиски серии. Композиции како „Lejla“ за Хари Мата Хари и „Оро“ за Јелена Томашевиќ постигнале големи успеси на Евровизија.
Покрај успесите како изведувач и композитор, во 2008 година се појавил и како водител на Евровизија во Белград, потврдувајќи го својот статус како еден од највлијателните музички уметници на Балканот.
