Македонската песна „Македонско девојче“ се слушна и во Јапонија, во изведба на оперски пејачи кои на публиката ѝ претставија дел од македонската музичка традиција.
Познатата песна ја изведоа јапонскиот оперски пејач Казухиро Котецу и членовите на „Менс Клаб оф Токио Опера“ од Токио, а особено интересно е што ја отпеаја на македонски јазик.
За јапонските музичари ова не е прва средба со музиката од Балканот. Тие веќе подолго време пројавуваат интерес за балканското музичко наследство, а во својот репертоар вклучуваат и традиционални песни од Македонија.
View this post on Instagram
Овојпат изборот падна на „Македонско девојче“, песна која со децении е препознатлив дел од македонската музичка ризница. Во нивната интерпретација, добро познатата мелодија доби поинаков, оперски израз.
Изведбата на јапонските пејачи е уште еден показател дека македонската традиционална музика наоѓа свои почитувачи и далеку од земјава. Преку нивниот настап, „Македонско девојче“ стигна до публика од друга културна средина, илјадници километри од Македонија.
