Светски познатиот модел Стела Тенант вчера ненадејно почина на 50-годишна возраст, објави денес нејзиното семејство, пренесува „Guardian“.
Во соопштението за јавноста, семејството на Стела наведе:
„Со неизмерна тага објавуваме дека Стела ненадејно почина на 22 декември, во 50-та година од животот. Стела беше прекрасна личност и голема инспирација за сите нас и многу ќе ни недостасува“, се вели во соопштението.
Семејството замоли јавноста да ја почитува приватноста, а деталите од погребот дополнително ќе бидат објавени.
Стела беше познат британски модел, внука на Ендру Кевендиш, војводата од Девоншир.
Студирала вајарство на „Winchester School of Art”, а ги красеше насловните страни на многубројни светски познати магазини повеќе пати, меѓу кои и насловната на „Вог“, неколкупати стоеше на чело на модните ревии на познатите модни брендови, а соработуваше и со модниот дизајнер Карл Лагерфилд.
