На српската пејачка Анѓела Игњатовиќ – Бресквица ѝ е забранет влез на Косово, поради што е откажан нејзиниот вечерен настап во Косовска Митровица, објави еден белградски медиум.
Според достапните информации, пејачката била запрена од припадници на косовската полиција и вратена од административниот премин, но причините за забраната засега не се познати.
Бресквица им се обрати на своите фанови кои ја очекуваа на концертот.
„Од срце ви благодарам што издвоивте време да дојдете вечерва, да се дружиме и пееме заедно. За жал, мојот бенд и јас не успеавме да го поминеме административниот премин и вечерва нема да можеме да настапиме, но сигурна сум дека наскоро ќе се видиме и ќе ве известам за нов датум“, порача таа.
Настапот во Северна Митровица го организирала Српска листа, а потврдено е дека наместо Бресквица ќе настапи пејачот Боба Ракиќ.
Потсетуваме, Бресквица минатата година се натпреваруваше на српскиот избор за Песна за Евровизија со песната „Гнездо орлово“. Нумерата предизвика реакции бидејќи некои сметаа дека има политичка порака поврзана со Косово, но пејачката ги отфрли тие тврдења.
