Посетителите на овогодинешното издание на „Скопје анплагд“ (Skopje Unplugged) во петокот на бината на винаријата „Камник“ и почитувајќи ги здравствените протоколи, имаа можност да слушнат некои од македонските музички изведувачи во специјално адаптиран акустичен сет.
– Почитувајќи ги сите препораки на надлежните институции за заштита од коронавирусот, како и одлуката на Владата да одржи концерти и настани на отворено, „Скопје анплагд 2020“ покажа дека е можно музиката да нѐ сплоти и да нѐ поврзе дури и во услови на физичка дистанца – наведоа организаторите на манифестацијата ЈУ Универзална сала.
На овогодинешното издание на „Скопје анплагд“, фокусот беше во целост ставен на македонските изведувачи, на кои им е потребна огромна поддршка во овие неизвесни периоди.
Со почеток во 19:07 часот, фестивалот го отвори Сара Мејс, со изведба на нејзините најголеми хитови. Публиката потоа ја забавуваше групата „Фолтин“, во уникатен акустичен стил со изведба на „Везилка“, „Милице“. За крај на концертот, Тамара Тодевска настапи со својот бенд и акустична изведба на дел од песните кои ја одбележаа нејзината богата кариера.
Фестивалот „Скопје анплагд“ е во организација на ЈУ Универзалната сала, под покровителство на Град Скопје и со поддршка на винаријата „Камник“.
