Даниел Крег и Рејчел Вајс се познавале со години пред да дојде вистинското време целосно да се посветат на нивната љубовна приказна.
Холивудскиот актер Даниел Крег светската слава ја стекна со улогата на Џејмс Бонд, а оскаровката Рејчел Вајс ја паметиме по многу остварувања на филмското платно. Кога тие тајно се венчаа во 2011 година, го изненадија целиот свет.
Како што пренесуваат странските медиуми, Даниел и Рејчел се запознале на универзитетот, пред некој од нив да стане светски познат, поточно нивната прва средба се случила во 1994 година во Националното театарско студио.
За тоа сведочи оперскиот критичар, Руперт Кристијансен, кој првпат ги видел како работат заедно во претставата наречена „Les Grandes Horizontales“. Кристијансен работел како историски консултант на претставата за куртизаните од 19 век и често се дружел со нив.
„Се разбира, ниту еден од нив не беше познат во тоа време, па нивната прва средба остана незабележена. Заплетот на претставата ги доведе во бројни љубовни клинчови и имаше многу сексуални сцени и сексуална хемија меѓу нив“, изјави тој за Дејли Телеграф.
После тоа, нивните актерски кариери напредуваа, но нивните патишта се разидоа и секој го пронајде својот успех, и во кариерата и во љубовта. Многу години подоцна, нивните патишта повторно се вкрстија кога добија улогата на брачна двојка во трилерот „Куќа од соништата“.
Во тоа време, деветгодишната врска на Рејчел со режисерот Дарен Аронофски била при крај, како и свршувачката на Даниел со Сацуки Мичел. Така, на крајот од снимањето, тие конечно решиле да истражат и да откријат што чувствуваат еден за друг.
Рејчел во едно интервју искрено призна дека не им се случила љубов на прв поглед. Пред Даниел повторно да влезе во нејзиниот живот, Рејчел поминала девет години со Дарен, со кого и покрај долгогодишната врска и синот Хенри кого го добија во 2006 година, тие не се венчале.
Даниел успеал да ги промени нејзините уверувања за бракот бидејќи и самата не верувала дека некогаш ќе се омажи.
„Никогаш не мислев дека ќе се омажам. Тоа не беше моја амбиција и размислував спротивно. Никогаш не можев да се поврзам ни со романтичните комедии. Но, тогаш едноставно се случи, бев среќна и позрела. Со гордост го носам прстенот“, изјави Рејчел за Стандард.
Нивната венчавка била тајна, а после тоа решиле да го држат животот подалеку од јавноста и денес се познати како еден од најприватните парови во Холивуд.
