Легендарниот кантавтор, поет и шансониер Арсен Дедиќ, почина на 78-годишна возраст на денешен ден во 2015 година. Живееше во хармоничен брак цели 42 години со Габи Новак и често нагласуваше дека годините поминати со Габи му биле најубавиот дел од животот. Габи Новак почина на 89-годишна возраст на 11 август 2025 година, два месеца по смртта на нејзиниот единствен син, Матија Дедиќ.
Љубовната приказна на Габи Новак и Арсен Дедиќ е една од најубавите на хрватската естрада, обележана со длабоко пријателство кое со текот на времето прераснало во трајна љубов.
Нивната врска не била љубов на прв поглед, туку полека и сигурно се развивала низ годините на пријателство, заедничките музички соработки и нежните чувства.
Омилениот музички пар
Арсен напишал голем број композиции за Габи, а нивната симбиоза на професионалниот и приватниот живот била исклучителна.
Тие се запознале во 1958 година пред телевизиско студио во Загреб, додека и двајцата биле во брак – Габи со композиторот Стипица Калоѓера, а Арсен со Весна Матош, со која имал ќерка.
Арсен тогаш бил млад кантавтор и поет од Шибеник, на самиот почеток на музичката кариера, а таа веќе била афирмирана пејачка која соработувала со врвни музичари, меѓу кои и легендарниот Луис Армстронг. Судбоносната средба ја организирал текстописецот Марио Болиуни, кој на Габи ѝ го претставил како „еден слаб, блед младич од Шибеник, чие вистинско име е Игор Кримов, но сите го викаат Арсен Дедиќ“.
Габи подоцна се присетувала дека Арсен уште тогаш знаел која е таа и дека уште во 1958 година во својот тефтер во Шибеник имал залепено нејзина фотографија. При следната средба ѝ го донел и тефтерот. Тоа бил почетокот на едно посебно пријателство – првично се среќавале поради работата. Арсен го превел текстот на песната „Некој бдее над мене“ за нејзиниот прв ЛП во 1962 година, а потоа продолжиле да соработуваат на бројни проекти.
Во еден момент, како што опишал Арсен, „сфативме дека не можеме да живееме еден без друг“ и одлучиле да живеат заедно, без голема помпа околу прогласувањето на големата љубов – нивната блискост била природно продолжение на долгогодишната доверба и разбирање.
Пред да основаат семејство, Габи останала бремена, но доживеала спонтан абортус откако добила лажен телефонски повик во кој ѝ било кажано дека Арсен загинал во сообраќајна несреќа. Тој шок длабоко ги погодил, но и дополнително ги зближил. Конечно, во 1973 година им се родил синот Матија, а еден месец подоцна се венчале – и останале заедно повеќе од четири децении, споделувајќи го животот, љубовта и музиката.
Арсен често истакнувал колку Габи му била „наменета“ – односно жената со која сакал да го помине животот до крај. По неговата смрт во 2015 година, Габи останала прочуена музичка дива која и понатаму го чува споменот на нивниот заеднички живот исполнет со љубов, хармонија и музика, пишува хрватски „Тпортал“.
Нивната љубовна приказна е симбол на постојаноста и длабочината на чувствата што ги граделе заедно, како во приватниот живот, така и преку уметноста, оставајќи траен белег во хрватската музика и култура.
Тајната на нивниот брак била меѓусебната почит. Арсен еднаш на најдобар начин го опишал тоа: „Кога имате некого како Габи, не можете да бидете несреќни.“
View this post on Instagram
