Иранката која се прослави со неуспешни пластични операции кои драстично го сменија нејзиниот изглед во желбата да изгледа како холивудската ѕвезда Анџелина Џоли, повторно ја заинтригира јавноста. Нејзиниот адвокат побара да биде ослободена во април, бидејќи добила коронавирус.
Фатемех Кишванд (19), попозната како Сахар Табар на Инстаграм, но и како „Иранската Анџелина Џоли“, е во затвор од октомври минатата година по повеќе обвиненија, вклучително и богохулие и поттикнување на насилство.
Таа беше уапсена за своите активности на социјалните мрежи, а сега е осудена на десет години затвор, пишува Дејли меил. Таа е обвинета за „морална корупција на младите“ и непочитување на Исламската Република, сето тоа затоа што на Инстаграм објавила монтирани фотографии од своето лице.
Заради фотографиите, странските медиуми ја нарекоа „зомби Анџелина Џоли“ и „Иранската Анџелина Џоли“, а во еден момент на Инстаграм ја следеа скоро половина милион луѓе.
„Сметаме дека е неприфатливо една млада жена со коронавирус да се наоѓа во такви околности, а нејзиниот притвор да биде продолжен“, рече адвокатот за човекови права Пајам Дерафшан.
Фатемех наводно направила 50 козметички операции, а признала и дека гладувала со години, па затоа имала само четириесет килограми.
