Британската кралска ковачница издаде комеморативна монета со рок групата „Queen“, во чест на легендарниот пејач Фреди Меркјури и останатите членови на бендот.
– Ова е еден од тие посебни моменти во животот. Имаме кованица од нашето кралство вредна пет фунти, која ја изработи кралската ковачница – рекол гитаристот на групата Брајан Меј.
– На едната страна е The Queen (кралицата Елизабета), а на другата е групата „Queen“. Тоа никогаш порано се нема случено – додал Меј, не криејќи ја својата возбуда и радост поради оваа несекојдневна монета.
Сите британски монети и банкноти содржат ликови на монарси.
На монетата е логото на групата и инструментите кои ги свиреле членовите на бендот: Клавирот на Фреди Меркјури, „Red Special“ гитарата на Меј, Лудвиговиот тапан на Роџер Тејлор, како и Фендеровата бас гитара на Џон Дикон.
Монетата е издадена во златна и сребрена варијанта, а цената варира од 13 фунти за сребрената до 2.100 за златната верзија.
Ова е прва монета во планираната серија на „музички легенди“, објави кралската ковачница.
