Хрватскиот претседател Зоран Милановиќ, по повод одбележувањето на Меѓународниот ден на образованието, го посети Факултетот за ветеринарна медицина на Универзитетот во Загреб и по тој повод даде изјава за медиумите.
Меѓу другото, тој се осврна и на пресудата на Врховниот суд за случајот со Северина Вучковиќ и старателството на нејзиниот син.
„Случајот ‘Северина’ трае веќе девет години. Тоа момче веќе доби бели влакна, веројатно полуде. Не знам какви се татко му и мајка му, но каде се судовите? Можеби нешто треба да се смени во Уставот. Тоа е сериозна тема“ изјави Милановиќ, пренесе „24 сата“.
Да потсетиме, хрватската пејачка Северина Вучковиќ минува низ повеќегодишна голгота во врска со старателството над нејзиниот син Александар. Пред три дена, Врховниот суд на Република Хрватска повторно ѝ го одзема поделеното старателство и целосно му го предаде на нејзиниот поранешен партнер Милан Поповиќ, кој е татко на детето.
