Поранешниот фудбалер на Манчестер јунајтед, Рио Фердинанд, викендов ќе се венча со 27-годишната Кејт Рајт. Според пишувањето на британските медиуми, церемонијата би требало да се одржи во луксузен хотел во Турција, во кој идните младенци веќе стигнале заедно со останатите гости.
Фердинанд и неговата вереница сакаат својот најсреќен ден да го скријат од очите на јавноста, па така сите гости требало да почитуваат одредени правила.
„Нивните семејства и пријатели се веќе таму и одземени им се мобилните за да не можат ништо да фотографираат“, рекол извор за Сан.
Парот е во врска две години.
Познато е дека животот на Фердинанд го обележи голема трагедија. Пред четири години од рак на градите почина неговата сопруга Ребека Елисон (35). Нејзината смрт го скршила, па тој барал спас во алкохолот.
„На почетокот многу пиев навечер. Имаме куќна помошничка која живее со нас и кога таа ќе си легнеше, среде ноќ одев да пијам. Пиев многу првите три или четири месеци. Но станував рано за децата да ги однесам во училиште“, раскажал Фердинанд.
Како што вели, токму децата Лорент, Тејт и Тиа му биле главна мотивација за да продолжи со животот.
