На денот кога Владимир Блажев – Панчо ќе го прославеше својот 47. роденден, неговите најблиски, соседи, пријатели и бројни почитувачи вчера му оддадоа почит со откривање мурал со неговиот лик пред зградата во која живееше во скопската населба Аеродром.
Емотивниот собир помина во духот на маалската дружба, музиката и спомените за еден од најомилените македонски музичари. Голем број граѓани се собраа за да се потсетат на заедничките моменти со Панчо, а откривањето на муралот беше проследено со неговите песни.
Издавачката куќа „Шур шотц“, чиј соосновач беше Панчо, сподели фотографии од настанот и порача дека се надева ова собирање да прерасне во традиција.
„Денес, на денот на роденденот на Панчо, за првпат се прикажа мурал со неговиот лик пред зградата во која живееше. Преку маалска дружба и музика, се потсетивме на него и убавите заеднички моменти. Фала им на дечките од Аеродром за иницијативата и изработката на муралот и се надеваме дека оваа собиранка ќе ни прерасне во традиција“, напишаа тие, завршувајќи ја објавата со пораката: „Засекогаш П“.
По повод неговиот роденден, од „Шур шотц“ вчера објавија и фотографија од Панчо на Инстаграм со кратка, но емотивна порака.
„Среќен роденден, стари. Фалиш…“, напишаа неговите соработници.
