Македонската пејачка Елена Ристеска беше меѓу изведувачите на првиот концерт од музичко-сценскиот проект „Силно светнал ден“, организиран по повод одбележувањето на 35-годишнината од независноста на Македонија.
Концертот се одржа на стадионот „Билјанини Извори“ во Охрид, каде што Ристеска пред публиката ја изведе „Нинанајна“ – песната со која ја претставуваше Македонија на Евровизија во Атина во 2006 година.
За оваа пригода, пејачката се појави во елегантна црна креација со нагласени ракави и долг проѕирен долен дел. Изгледот го надополни со широк ремен со златна тока, високо коњско опавче и впечатлива сценска шминка. Фотографии од нејзиниот целосен изглед сподели мејкап артистката Мери Бајрамовска.
Проектот „Силно светнал ден“, во режија на Дејан Пројковски, е осмислен како музичко-сценско патување низ 35 години независна Македонија. Во програмата се спојуваат музиката, театарот и поезијата, со осврт на значајни моменти од македонската културна и колективна меморија.
Во центарот на сценската приказна беше Игор Џамбазов, кој во улога на домаќин и раскажувач ја водеше публиката низ различни периоди и генерации, тргнувајќи од прашањето: „Како се пишува песна за Македонија?“.
На сцената настапија повеќе од 30 домашни изведувачи од различни генерации и музички жанрови. Меѓу нив беа Тамара Тодевска, Андријана Јаневска, Ана Дурловска, Игор Дурловски, Пере од „Нокаут“, Бојана Скендеровски, Александар Тарабунов, Тони Зен, Таско, „Некст тајм“, Ана Петановска и Лина Пејовска.
