Една од најпознатите српски модни инфлуенсерки, Тамара Калиниќ, стапи во брак со италијанскиот моден менаџер Филипо Теста на романтична церемонија покрај езерото Комо во Италија.
Двојката судбоносното „да“ го изговори во луксузната „Вила Пицо“, а фотографиите од свадбата Калиниќ ги сподели на својот инстаграм-профил.
Според српските медиуми, на свеченоста присуствувале околу стотина гости – членови на семејството, блиски пријатели, како и познати имиња од светот на модата и бизнисот. Свадбата била организирана во строга приватност за младенците и нивните гости да можат непречено да уживаат во својот ден.
Еден од најемотивните моменти бил пристигнувањето на невестата до олтарот во придружба на нејзиниот татко, додека за музичката атмосфера бил задолжен хор од 18 членови кој изведувал оперски арии.
View this post on Instagram
Калиниќ, која важи за една од највлијателните модни инфлуенсерки во регионот, за свадбата избрала две венчаници, додека младоженецот носел елегантен бел костум.
Филипо Теста со години гради кариера во светот на луксузната мода. Во текот на својата професионална кариера соработувал со модните куќи „Оф-Вајт“ и „Балман“, а во модната индустрија важи за успешен и ценет менаџер.
Тамара и Филипо се во врска од 2020 година, а иако својот приватен живот главно го чуваат далеку од очите на јавноста, инфлуенсерката во повеќе наврати истакнала дека токму покрај него ја пронашла љубовта, мирот и поддршката што отсекогаш ги посакувала.
