Македонската инфлуенсерка Миа Костова (42) повторно отворено проговори за својот однос кон исхраната, килограмите и физичкиот изглед. Со фотографии направени во 2023 и 2026 година, таа покажа како се менувало нејзиното тело, но и како со текот на времето се променил нејзиниот пристап кон храната.
На Инстаграм, Костова призна дека некогаш стравувала оти по четириесеттата година ќе ѝ биде сè потешко да ја одржува посакуваната тежина. Денес, како што вели, размислува поинаку и смета дека најважно е да се изградат навики што можат долгорочно да се одржуваат.
„Имав голем страв дека со годините е сè потешко да изгледаш пристојно. Не се плашете, не е баш така.
Не постои операција, лек или диета која ќе ве држи сигурни на една килажа цел живот“, напиша таа.
Миа се присети и на периодот за време на пандемијата, кога за само една година се здебелила 20 килограми. Претходно, како што откри, тежела 53 килограми и се придржувала до строги ограничувања во исхраната.
„Силни рестрикции и неодржливи килажи може само да ве зезнат како мене во короната.
Имав 53 кила и јадев за да преживеам. Кога ми дојде преку глава, качив 20 кила за една година“, раскажа Костова.
По тој период успеала да намали 15 килограми, а подоцна повторно качила неколку. Така, според неа, ја достигнала тежината што денес ѝ одговара.
„Знаев дека мора да ги симнам. Ама не симнав 20, туку 15, за после една година да качам 3-4 и да дојдам до мојата одржлива килажа, која е 64-65 кила веќе 4 години“, објасни таа.
„Порано перев раце ако фатам нутела, денес пробувам од сè“
Костова нагласи дека строгите забрани и постојаниот притисок околу килограмите можат да создадат нездрав однос кон храната. Според нејзиното искуство, умереноста и свесното јадење се покажале како подобар избор од краткорочните диети.
„Рестрикции и константен притисок прават многу погрешен однос со храна. Секоја крајност ве враќа на почеток“, напиша инфлуенсерката.
Таа откри дека денес не си забранува одредени намирници и не чувствува потреба да се казнува поради повременото уживање во омилената храна.
„Порано перев раце ако фатам нутела, денес пробувам од сè. Свесно и без терет“, порача Миа.
Во изминатите години, Костова јавно зборуваше и за вежбањето, броењето калории и хируршкиот зафат на долниот дел од стомакот. Сепак, во најновата објава истакна дека ниту една интервенција не може да биде трајна замена за промената на навиките.
„Ништо не е трајно – ни тегови, ни кратење желудник, ако не се договориш со себе“, заклучи таа.
