Поп-ѕвездата Мајли Сајрус повторно го привлече вниманието со провокативен потег – таа се соблече целосно гола за новата есенско-зимска кампања на француската луксузна модна куќа „Мезон Маржела“.
На фотографиите, направени од легендарниот италијански фотограф Паоло Роверси, 32-годишната пејачка е покриена само со бела боја за тело и препознатливите Таби чевли, додека во рацете држи нов модел на култната 5АC чанта.
„Стоев гола за модна кампања и тоа ми изгледаше моќно – носев само боја на телото и таби чевли. Во тој момент, јас и Маржела станавме едно“, изјави Сајрус.
Белото боење на телото е омаж на препознатливата „бјанкето“ техника на куќата, воведена уште во 1989 година. Сајрус, со изрусени веѓи и минималистички изглед, дополнително го истакна контрастот помеѓу кревкоста и силата, што е во сржта на колекцијата.
„Мезон Маржела“ објаснува дека новата линија се темели на концептот на „спасување и обновување на гардеробата“, па облеката носи предизвикани набори, избледени бои и впечаток на повторно оживеани парчиња – како моден омаж на трајноста и отпорноста.
Покрај голата фотографска серија, Сајрус позира и во волнен капут, сатенски фустан и здолниште, кои ја претставуваат карактеристичната естетика на „Маржела“.
Ова не е првпат Сајрус да изненади со соработка со големи модни имиња. На годинешната Мет гала таа носеше уникатно парче од „Алаја“, кој според неа симболизирал „идентитет, сила и гордост“.
