Азис, кралот на бугарската поп-фолк сцена, отсекогаш важел за ексцентрична личност кога станува збор за неговиот сценски настап. Иако во последните години се појавуваше со повеќе мажествен изглед, а ретко во женска облека, овој пат повторно ја изненади јавноста.
На последните фотографии што ги објави на социјалните мрежи, пејачот позира во елегантен и блескав син фустан, објаснувајќи дека пробува различни тоалети за претстојниот концерт на 14 февруари 2026 година во „Арена Софија“.
„Кога Емануела си го заборави фустанот кај мене дома. Веднаш следуваат проби за мојот концерт“, напиша Азис во описот на фотографиите, алудирајќи дека токму колешката му го позајмила фустанот за фотосесијата.
Пејачката Емануела, со која Азис е во блиски односи, ден претходно му донела домашни полнети пиперки што тој ги пофалил, па не е исклучено таа да биде и специјална гостинка на неговиот настап.
Фотографиите предизвикаа бројни коментари на социјалните мрежи, а дел од обожавателите сметаат дека Азис се враќа кон имиџот од своите почетоци, кога редовно настапуваше во женски фустани. Фановите дури шпекулираат дека на сцената во „Арена Софија“ би можел да се појави во легендарниот бел фустан од видеоспотот за неговиот мегахит „Ледена кралица“.
