Хоакин Феникс го освои Оскарот и одржа инспиративен говор: Не се чувствувам над другите, бидејќи сите ја делиме истата љубов! (ВИДЕО)

Без големи изненадувања, Оскарот за најдобар актер на овогодинешното доделување му припадна на Хоакин Феникс, за феноменалната улога во филмот „Џокер“. 

Откако му беше врачена наградата, Хоакин излезе на сцена за да го прими Оскарот, каде уште еднаш покажа дека покрај неверојатната глума, овој човек е и голем иснпиративен говорник, кој повторно ги освои сите со својот фантастичен говор. 

Ви пренесуваме дел од говорот на Феникс кој со сигурност ќе влезе во историјата на Оскарите: 

„Во моментов сум полн со многу благодарност. Не се чувствувам над другите номинирани или кој било во просторијава бидејќи сите ја делиме истата љубов – тоа е љубовта кон филмот. А оваа форма на изразување ми подари неверојатен живот. Не знам каде би бил без него.

Понекогаш мислам дека сметаме или сме принудени да сметаме дека се бориме за различни каузи. Но, според мене, јас гледам заедништво. Без разлика дали зборуваме за родова нееднаквост или расизам, или права на сексуалност, или права на припадност, или права на животните, зборуваме за борба против неправдата.

Зборуваме за борбата против верувањето дека една нација, еден човек, една раса, еден пол, еден вид има право да доминира и да ги користи и контролира другите без да биде казнет.

Мислам дека веќе не сме поврзани со природниот свет. Многумина од нас гледаат на светот од егоцентрична појдовна точка и мислиме дека сме центар на универзумот. Одиме во природниот свет и му ги ограбуваме ресурсите. Сметаме дека имаме право вештачки да оплодиме крава и да ѝ го украдеме бебето, иако нејзините крици на болка се незапирливи. Потоа го земаме нејзиното млеко, кое е наменето за нејзиното теле и го ставаме во нашето кафе и во нашите житарки.

Се плашиме од идејата за лична промена бидејќи мислиме дека треба да жртвуваме нешто, да се откажеме од нешто. Но, најдобрите човечки суштества се креативни и иновативни и ние може да создаваме, развиваме и имплементираме системи за промена кои имаат поволности за сите суштества со чувства“, порача меѓу другото одличниот актер.