Познатиот српски актер и режисер Драган Бјелогрлиќ пред неколку дена заврши во притвор под сомнение дека во хотелот „Амбасадор“ во Ниш физички го нападнал режисерот Предраг Гага Антонијевиќ и го удрил неколку пати во главата.
Со одлука на Основното јавно обвинителство, мерката притвор беше укината по неговото сослушување, а Бјелогрлиќ беше пуштен да се брани од слобода во понатамошниот тек на постапката.
„Тој целосно призна дека го извршил кривичното дело и изрази жалење. Имајќи го предвид овој вид одбрана, обвинителството одлучи да му ја укине мерката притвор“, рече заменик јавниот обвинител Владимир Станојевиќ, пренесува српски „Блиц“.
„Отсекогаш се прашував зошто го сакам овој град и сфатив дека дури и во најтешките моменти овој град е со мене. Им благодарам што беа професионални, му благодарам на обвинителството што не подлегна на притисокот, што професионално и човечки си ја завршија работата и што ми дадоа можност да објаснам што навистина се случи. Она што навистина се случи не е ништо од она што го напишаа таблоидите на режимот. Жал ми е што наидов на ужасните провокации на г-дин Антонијевиќ, кои траат повеќе од година и пол. Жал ми е што се појави г-дин Антонијевиќ, не знам зошто, токму во моментот кога имав две прекрасни премиери, жал ми е што не можев да поднесам достоинствено да ги игнорирам неговите ужасни провокации, што дозволив ова да фрли сенка врз овие два значајни настани во Ниш. Жал ми е што го направив тоа“, рече Бјелогрлиќ во изјава за српските медиуми.
Адвокатот на Бјелогрлиќ, исто така, даде изјава, нагласувајќи дека при вештачењето не се пронајдени психоактивни супстанции или недозволени количини алкохол. „На видеото се гледа дека немало жесток напад одзади. Апсолутно сè беше утврдено со денешните информации и денешната судска одлука“, рече адвокатот.
Бјелогрлиќ, пак, објасни што точно се случило. „Воопшто не отидов кај него, тоа го знаат луѓето од хотелот „Амбасадор“, отидов во тоалет и реагирав на неговото дофрлање“, рече тој.
