Родителите биле бесни откако им било кажано дека нивните тринаесетгодишни деца за домашна задача мора да го испланираат својот погреб. Учениците од католичкото училиште „Свети Павле“ во Лестер ја добиле оваа задача по веронаука за време на пандемиските мерки.
На учениците им дале образец во кој морале да одлучат за начинот на погребувањето и да објаснат зошто така одлучиле, како и да се изјаснат по повод нивната омилена музика или химна и цвеќето за поменот.
„Каде би сакале вашето тело да биде погребано? Каде сакате да се фрли вашата пепел?“, стоело во задачите.
Другите прашања за децата биле кого би поканиле на погребот и како би сакале семејството да ги облече.
Родителите сметаат дека тринаесетгодишниците се премногу млади за да им се додели таква задача, особено за време на пандемијата на коронавирусот, кога починале многу луѓе.
„Ова е одвратно, особено затоа што сме во пандемија и илјадници луѓе умираат“, напишал еден загрижен родител.
Од училиштето се извиниле и рекле дека задачата била дадена „по грешка“.
