Можеби сте забележале дека кога вашето куче ќе слушне некој чуден звук или кога ќе му кажете нешто, ја навалува главата настрана и сигурно сте се запрашале – Зошто? Ние го имаме одговорот за вас, пренесува „VACHospitals“.
Се обидуваат да нè разберат
Mиленичето се обидува да идентификува познати зборови или тонови кои ги поврзува со награда (прошетка или закуска). Мускулите на средното уво на кучето го контролираат делот од мозокот кој е одговорен за изразите на лицето и движењата на главата, па некои експерти заклучуваат дека кучето ве слуша на овој начин и се обидува да комуницира.
Се местат да нè слушнат подобро
Кучињата имаат подвижни ушни школки, што им овозможува да го лоцираат изворот на звукот и насоката од која доаѓа, а со помош на мозочните функции го одредуваат звукот што стигнува до ушите. Кога кучето ја движи главата, се снабдува со дополнителни информации, односно си помага подобро да го лоцира местото и оддалеченоста на изворот на звук.
Можат подобро да ни го видат лицето
Во обид да нè разберат, кучињата ги користат не само нашите зборови и интонација, туку и изрази на лицето, говор на телото и движења на очите. Затоа со навалувањето на главата се трудат подобро да ги видат знаците на нашето лице.
