Марина Петровска, велнес-советничка и менторка, преку сопственото искуство сфатила дека грижата за себе не е привилегија, туку неопходност. Низ годините, преку личното искуство и работата со жени, дошла до бројни сознанија за здравите навики и промените што можат да донесат подобар квалитет на живот. Со нашите читатели ќе споделува дел од своите искуства и совети, со желба да им помогне и на другите да направат чекор кон промена и подобар однос кон себе.
– Во последно време, разговарајќи со млади девојки и жени, често се фаќам себеси како размислувам за едно нешто: зошто толку често го бараме покомплицираниот пат?
Некој сака да ослабе – бара посебни диети, комплицирани рецепти и „совршен“ план. Друг сака да ја подобри кожата – бара брзо и силно решение. Некој сака да вежба – чека идеални услови, време и програма.
А понекогаш решението може да биде многу поедноставно.
Не велам дека сите проблеми имаат едноставни решенија. Но често знаеме што треба да направиме, само не ни се допаѓа тоа што бара од нас да бидеме доследни.
Затоа што ако нешто е комплицирано, лесно можеме да кажеме: „Не ми успеа“, „Не ми одговара“, „Немав време“.
Но ако е едноставно?
Тогаш останува само да го правиме.
Една мала промена. Една навика. Па уште една. Не спектакуларно, не преку ноќ, туку доволно долго за да стане дел од нас.
Можеби токму затоа личната промена е најтешка. Не затоа што не знаеме што треба да направиме, туку затоа што овојпат нема кого да обвиниме.
Никој не може да ги направи нашите избори наместо нас.
И можеби не ни треба секогаш ново решение.
Можеби понекогаш ни треба само да престанеме да го комплицираме едноставното – и конечно да бидеме доследни на она што веќе знаеме дека ни помага.
