Тимот на Јавното претпријатие за благостостојба и заштита на бездомните кучиња „Лајка“ ни ја раскажува среќната приказна за едно од многуте кучиња кои имаа среќа да пронајдат топол дом. Ова е приказната за хаската Вуки.
По половина година мината во стационар и упорност на тимот на „Лајка“ се најдоа соодветни вдомувачи на хаската Вуки, која инаку, веднаш стана миленик на сите негователи вработени во ЈП Лајка.
-По пријава од засегнати граѓани пред точно шест месеци од Општина Кисела Вода во тешка состојба беше пронајдено и заловено куче кое налик не изгледаше воопшто добро. Нашиот тим на оперативни работници- заловувачи успеаа да го заловат и донесат во нашето прифатилиште- вели негователот Бобо.
Од страна на докторот по ветеринарна медицина, раскажува Бобо, е утврдено дека станува збор за расно куче – хаска, кое подолг временски период преживувало низ скопските улици.
-Ветеринарните техничари ги направија сите потребни испитувања врз него, при што е утврдено дека има кожна болест, односно демодикоза. Работевме многу време со него, долг период Вуки беше под терапија, но успеа да закрепне и да го врати својот убав лик кој доликува за неговата раса- раскажува раководителката на оддлението за вдомување, Слаѓата Стаменкова.
Благодарение на вработените од Амбулантата при ЈП Лајка и негователите од одделот Вдомување кои пружија соодветен стручен третман, посветеност, грижа и социјализација денес Вуки е среќа и комплетно здрава единка.
– За Вуки пристигнуваа апликации од многумина потенцијални вдомувачи, но ние ја избравме совршената двојка која несебично ги отвори вратите од својот дом и отстапи катче само за него, вели Слаѓана Стаменкова.
Неговите сопственици се многу задоволни, велат дека домот им е исполнет со позитивна енергија откако Вуку е нов член на семејството.
-Внуците најмногу се израдуваа на Вуки, тој заедно со нив игра фудбал. Радоста кај внучињата се забележува на нивниот лик. Вдомивме прекрасно куче од вас- истакува новиот сопственик на Вуки, Лазар Лазаревски.
Хаските поради нивниот вроден темеперамент е една од најнапуштените раси, затоа тимот на Лајка е тука и пружаат соодветна грижа и нега за бездомните кучиња кои цирклулираат на територија на град Скопје и целат да го подигнат на повисоко ниво одговорното сопствеништво.
