Поради скапата струја не работи ни базенот „Карпош“. Градскиот базен се затвори се додека не се реши енергетската криза во земјата.
Наташа Мешковска, поранешна пливачка, а денес тренер по пливање, не остана „глува“ на ситуацијата.
„Денес се затвори под клуч и единствениот пливачки објект кој функционираше за клубовите и граѓаните, базенот Карпош. Со тоа и официјално се уништи најздравиот спорт за секое дете, за секој човек, пливањето. Спорт во кој имаше врвни резултати и нацијата беше горда на тоа. Образложението е дека има дефект, но никој не верува во тоа. Трошок им е. Затоа нема да работи“ – објави нашата пливачка легенда Наташа Мешковска на својот Фејсбук профил.
Потоа, објасни дека бидејќи „Спортскиот центар БТ е под капа на Владата“ ја повикува новата Влада и новиот премиер да се заложат и да најдат начин базенот пак да биде ставен во функција, акцентирајќи дека е уништено и тоа малку што е оставено во наследство од нашите претци.
– Базените се градени од самопридонес на граѓаните на оваа земја. Платени сте да работите, а не да затварате, додаде Мешко.
