Нејзината животна приказна треба да се препрочита секогаш кога ќе почувствуваме дека веќе немаме никакви шанси во животот.
Џоан „Џо“ Роулинг не е само најбогата писателка на светот, таа е личност со интензивен внатрешен свет и личност која успеа да ја побие изреката „не можете да ги задоволите сите“. Можеби не сите, на пример, Доналд Трамп не ја сака многу, но 90 отсто од човештвото, да. Дури и оние кои не ги прочитале авантурите на волшебникот не можат да не се восхитуваат на способноста со која Џоан стигна на врвот на славата за само пет години – стартувајќи од позиција на жена која прима социјална помош. Џоан, преку личниот пример, како и преку приказната за Хари Потер, нè научи дека никогаш не треба да се откажуваме.
Со бујна фантазија, Џоан создавала приказни уште од детството. На шест години веќе пишувала раскази за еден зајак со сипаници, кои ѝ ги читала на нејзината помала сестра Дијана. Нејзиното родно место е обвиткано со мистерија, можеби токму поради детскиот вкус за креирање на измислен живот: за некои тоа е Јејт, близу Бристол, за други е Чипинг Содбери, во Глостершир. Едно е сигурно – возовите ја инспирираат. Нејзините родители, Питер и Ана, се запознале на осумнаесет години на станицата Кингс Крос во Лондон и сигурно тоа ѝ го раскажале како бајка. Нејзиниот дедо по мајка, Луј Волант, се истакнал по храброста за време на Првата светска војна и бил награден со Воен крст. Во иднина, внуката со горчина ќе открие дека не му била доделена Легијата на честа само заради скромната позадина – епизода што ќе додаде уште едно парченце на нејзината чувствителност. Роулингс се сели двапати, во Винтербурн во Јужен Глостершир, а потоа во Велс. Докажала дека е повеќе склона кон литература отколку кон математика, учејќи француски, латински и старогрчки јазик. На училиште се сретнала со голем број луѓе кои подоцна ќе ги инспирираат ликовите на училиштето за магии „Хогвортс“. Нејзиниот најдобар пријател ќе го опише преку ликот на Рон Визли, директорот на училиштето ќе биде Албус Дамблдор, а нејзиниот омразен професор по биологија – Северус Снајп. Хермиона Грејнџер е самата таа на 11 години.
Во 1982 година полагала приемен на „Оксфорд“, но не го положила, па школувањето го продолжила на Универзитетот „Ексетер“. Во тој период нејзината мајка се разболела од мултиплекс склероза. Во „Ексетер“ идната писателка ги слушала „Смитс“ и ги читала Толкин и Дикенс. По една година студирање се преселила во Лондон каде што нашла работа како двојазичен преведувач и секретарка во „Амнести интернешнл“. Потоа се преселила во Манчестер со своето момче за да работи во Стопанската комора, храм на бирократијата, што веројатно ќе ѝ послужи за инспирација за Министерството за магија. Додека чекала воз за Лондон што доцнел четири часа, ја добила целата идеја за романот за детето со магична моќ. Започнала да го пишува во следните денови. Во меѓувреме, нејзината мајка починала, и Џоан (25), била уништена. Колку од таа болка ќе се прелее во ликот на сиракот Хари?
Следувала нова селидба, овојпат во Португалија, во Порто, откако одговорила на огласот за работа како вечерна наставничка по англиски јазик. Таму, во еден бар, го запознала телевизискиот новинар Хорхе Арантес и цела вечер разговарале за Џејн Остин. Се венчале во октомври 1992 година, и ја имаат ќерката Џесика Изабел. Но, се разделиле само една година подоцна, според непотврдени гласини, поради семејно насилство. Писателката избегала со својата ќерка во Единбург, каде што живеела нејзината сестра. Во меѓувреме, приказната за Хари Потер почнува да се оформува на хартија, а животот на Џоан Роулинг, во тој момент, бил катастрофа – со пропаднат брак, невработена, со мала ќерка, и многу депресивна до таа мера што помислила и на самоубиство. Работите се влошиле кога, во очекување на разводот, била принудена да поднесе барање за мерка за забрана за доближување против нејзиниот сопруг, кој сакал да го земе девојчето. Како спас од депресијата, но и за да го пополни долгиот ден, сосема се посветила на пишување на романот за Хари Потер. Го пишувала во градските кафулиња по долгите прошетки на ќеркичката. Во 1995 година го завршила романот насловен „Хари Потер и каменот на мудроста“.
Го избрала својот книжевен агент според името кое ѝ звучело детско – Кристофер Литл, тој имал канцеларија во Фулам и – веднаш го фрлил ракописот во ѓубре сметајќи дека детските книги повеќе не се продаваат. Сепак, се премислил по ентузијастичкиот преглед на еден од неговите соработници, Брајони Евенс, кој уживал во готскиот призвук на приказната. Така, Агенцијата потпишала договор со Џоан. Кристофер Литл за ракописот бил одбиен дури од 11 издавачки куќи. За среќа, претседателот на „Блумсбери“ во Лондон, ракописот го дал на својата ќерка Алис да го прочита, а таа со ентузијазам побарала продолжение. „Блумсбери“ ја издал книгата во претпазлива серија од само илјада примероци, а бидејќи женските имиња на кориците го одбивале машкиот читател, одлучено е да се замени името Џоан со неутрално „Џ.К“, потсетувајќи на ЏРР Толкин. Литл пак, сè уште немал многу верба во романот и ја советувал авторката да не си создава илузии и да продолжи да бара подобра работа од писателската. Денес, зачуваните книги од тие први илјада примероци, вредат помеѓу 16 и 25 илјади евра. Што се случи понатаму со писателската кариера на Роулинг, на сите им е познато. Се продадоа милиони книги, стана побогата од кралицата Елизабета, а потоа „падна“ на второто место откако донираше голем дел од својата заработка во добротворни цели. Брендот „Хари Потер“ се проценува на околу 15 милијарди долари. Денес таа е среќно мажена за лекар, има уште едно дете, живее во луксузна резиденција во Шкотска, малку ги користи социјалните мрежи (а кога ќе го стори тоа, тоа е настан).
